FÀKAN

Ziirinda                                                                                                                    2016 06 18

Miɲankakɛ ka alijinɛko

Nin Kɛra miɲankamalennin dɔ ye n'a tɔgɔ tùn ye Laɲɔ ye. Laɲɔ Bangera k'a fà Sɔrɔ bolibato la. O kɛlen, Laɲɔ fana Lamɔna n'o taabolo kelen ye. Nkà a tùn bɛ kolon bɛɛ dɔ Kɛ. Laɲɔ tùn bɛ tali Kɛ, a bɛ Bìn musow kan w'a tùn bɛ dlɔ Mi fo ka sugunɛw ni banakɔtaaw K'a ka kulusi 'kɔnɔ tuma bɛɛ. Laɲɔ Tor'o de la fo silamɛya Nàna Dòn a kùn na. O kɛlen a fana y'i Sàra a 'fà n'a 'ba la k'a bɛ fɛ ka Tuubi ka Dòn silamɛya la. Ɔ, nkà Laɲɔ 'fà n'a 'ba tùn ye konɔgɔntigiw ye. Olu fana ye sira D'a ma ka Tla ka dugawu K'a ye. Ɔ, o kɛlen sa, Laɲɔ Taar'u ka alimami fɛ, k'a F'a ye k'a bɛ fɛ ka Tuubi. Aa! o hakilina dyakojugu o fana ye, a y'i kanto Laɲɔ ma ko:

-Aa! n 'den, Ala y'i Kanu koyi! Ale Ala b'a Fɔ a ka kuranɛ sanuman in 'kɔnɔ k'ale bɛ màa Dòn a ka alijɛnɛ na min ka d'a ye. N 'den n'i y'a Ye n Ko k'Ala y'i Kanu, e Laɲɔ Bangera k'i 'ba n'i 'fà To sira dɔ kan, wa i Lamɔna u 'bolo o sira kelen in kan. Ɔ, e ka Tla ka nin hakilina ɲuman in Sɔrɔ, o sababu de y'a To n Ko n k'Ala y'i Kanu, bari bɛɛ tɛ nin kùnnadya Sɔrɔ n 'den.

Alimami ka o kuma ninnu ye Laɲɔ Sewa ni k'a dya Dòn a yɛrɛ la kosɛbɛ. Ɔ, nkà yanni u ka Taa ni tuubi yɛrɛ ye sa, Alimami ye silamɛya ʃariya dɔw F'a ye. A ko Laɲɔ ko ni i Kɛra silamɛ ye ko ko damadɔw bɛ ye i n'a fɔ: Dlɔmi, jɛnɛya, sonyanni, nkalontigɛ ani màafaa, ko n'i Sera k'olu da Blà ko n'i Sàra k'Ala bɛ Hinɛ i la k'i Dòn a ka alijɛnɛ 'kɔnɔ. Ko n'i Dònna o alijɛnɛ in na sa, ko fɛn bɛɛ dɔ bɛ yen, ko mɛlɛkɛw bɛ to k'u Munun-munun a' ni ɲɔgɔn cɛla n'i ko fɛn min , u bɛ N'o D'i ma. Ko wa yen musow ka bon, u ka jan wa u cɛ ka ɲi o ye cɛɲɛ dàn ye, i dàn ye i k'a Fɔ mɛlɛkɛ dɔ ye i mago bɛ min na. Aa! Jaa Alimami ka kuma bɛɛ la min Dyar'a ye o Kɛra alijɛnɛmusoko in de ye. Ɔ, o kɛlen Laɲɔ ye tuubi Minɛ ka Kɛ silamɛ ye. Laɲɔ kɛlen sillamɛ ye a tùn bɛ ko kolon fɛn o fɛn Kɛ a y'olu bɛɛ Ye k'u To ye. Bɛɛ Kabakoyara Laɲɔ na k'a sababu Kɛ a ka jogo ɲuman ye. Ɔ, don dɔ, Laɲɔ n'a muso n'a dɔgɔninw Taara nɛrɛbɔ la. Laɲɔ tùn bɛ Se jirilayɛlɛn na ka Sago bɛɛ kan minkɛ, ale Yɛlɛnna, bɔbere b'a 'bolo, a dlonen bɛ nɛrɛbolow cɛla yen a bɛ nɛrɛ Tigɛ sɔn. Laɲɔ Tor'o la ka na Keleku ka Bɔ nɛrɛsun na ka Nà Fara dugu ma tayi! dɔgɔninw Bòlila k'u Madon a la yɔrɔ min u y'a Sɔrɔ hali a tɛ Se ka Lamaga. Aa! Bɔ 'ko 'ɲɛ dɛ! olu Girinna ka fàn bɛɛ Dòn ɲɔgɔn na k'u kɔrɔkɛ Sàra. Ɔ, u Nàna Laɲɔ ta ka Dòn wotoro 'kɔnɔ ka Taa n'a ye dɔgɔtɔrɔso dɔ la. U selen yen, dɔgɔtɔrɔw y'a Minɛ k'a Lada. Dɔɔni Kɛra minkɛ u Nàn'a Fɔ dɔgɔninw ye k'u k'u hakili Sìgi k'a ma Sa ko nk'a kirinnen dòn. Waatinin Sera dɔrɔn, Laɲɔ Bìnna ka ɲɛmatigɛ dɔɔni. A ɲɛmatigɛlen dɔɔni a ye dɔgɔtɔrɔkɛ dɔ tɛmɛtɔ Ye n'a ka dɔgɔtɔrɔfini jɛman y'a kanna, o y'a Sɔrɔ muso belebeleba janmanjan jɛman dɔ b'o 'kɔ, jaa o tùn ye banabaatɔ lajɛla dɔ ye. Aa! Laɲɔ Kɛ k'o Ye! a ko:

-Mɛlɛkɛ! mɛlɛkɛ!, n fana bɛ Se dɔ ma han! i b'i hakili To n yɛrɛ la.

Nkà dɔgɔrɔkɛ m'a Cì ka Kɛ Laɲɔ na. Laɲɔ y'i Yɛlɛma ka banabaatɔ wɛrɛ dalen Sɔrɔ a kɛrɛ fɛ, a Ko o ma.

- N terikɛ, o tuma na e fana Sàra a ma Mɛn wa?

O Sinna ka surunba dɔ Cì a la ni k'i ɲɛ Cɛ ka B'a 'kɔrɔ. Laɲɔ y'i kant'a ma ko

-N terikɛ o tumana e tuubitɔ djɛn na a ma Fɔ e ye ko nisɔndya dɔrɔn de bɛ yan alijɛnɛ na wa? ka n'i nisɔngoya. Aa, nkà n terikɛ ne ma min Fàamu, ne tuubitɔ djɛn na alimami ko ne ma ko n'i Sera alijɛnɛ 'kɔnɔ yan ko n'i mago Jɔra fɛn o fɛn na k'i b'o Kofɔ mɛlɛkɛ dɔ ye, ne dun ye alijinɛmuso ɲumanba dɔ Kofɔ mɛlɛkɛ dɔ ye nkà hali o ma sɛgɛ Walon ka Kɛ ne na, o tuma na yɛlɛma Dònna kow la almami ɲinɛ ma wa?.

Jaa! cɛ min tùn dalen bɛ Laɲɔ 'kɔrɔ o tùn ye sɛnɛfɔ de ye. O Nàn'i kanto Laɲɔ ma ko:

- E ye jɔn ye?

-Ka ne To djɛn na ne tɔgɔ tùn ye Laɲɔ, n jàmu tùn ye kɔnɛ ye, nkà u ma 'tɔgɔ Da n na yan fɔlɔ.

-E ye ʃiya jumɛn ye? sɛnɛfɔkɛ kan bɛ ten.

-Ne wa? ne tùn ye miɲanka de ye, nkà yan mɛlɛkɛw ma 'fɛn Fɔ n ye o ko kan fɔlɔ.

O kɛlen Sɛnɛfɔkɛ Yɛlɛla kwa! kwa! kwa....k'i kanto ko.

-Miɲankakɛnin, i bɛ dɔgɔtɔrɔso de 'kɔnɔ, musoko t'i la o! i Sìgi yan ko alijɛnɛmuso. N'i y'a Lase walimuso min ma yan i na Taa lahara yɛrɛ-yɛrɛ la o sèn fɛ. O kɛlen sa, Laɲɔ ɲɛmatigɛra pew, a fàamu k'ale tɛ lahara, sɛnɛfɔkɛ fana ye yɛlɛ min Kɛ o Kɛra o fana ka bana banni sababu ye. U fla bɛɛ Wulila k'u kɔ Bugɔ.

N y'o Tà yɔrɔ min, n y'o Blà yen.

 

 

Blàdon : 2016-06-19     Yɛlɛmako laban : 2016-06-19


I fɛla Fɔ fasiri kan :

Captcha

Jagomajira

Fàkan bataki

Sìgidɔn

Jyɛn jamanaw

 

Mali duguw

Daɲɛsɛbɛn

Maralenw

2018

2017

2017-12

2017-10

2017-09

2017-08

2017-07

2017-06

2017-05

2017-04

2017-03

2017-02

2017-01

2016

2016-12

2016-11

2016-10

2016-09

2016-08

2016-07

2016-06

2016-05

2016-04

2016-03

2016-02

2016-01

2015