FÀKAN

Fàrafinna denmisɛnninw ka dànkelen-ntolaci: CHAN tàko 4nan Kùncɛra Ruwanda karidon

Kabini waati 16nan Sera sanga 30 ma, ntola ciko fɔlɔ Kɛra Mali ni Kɔngo Kinʃaʃa 'cɛ. Ntola in yɛrɛ da Minɛna san 'jukɔrɔ.

Mali ka ntolacilaw tùn bɛ fìni nɛrɛma la ninka Kɔngo taw Kɛ baga ni blènman na. Filili fɔlɔ min Kɛra ntola 'kɔnɔ o Kɛra Mali jìgiya la. Mali fana Kɛra ɲankelisɛbɛn nɛrɛma sɔrɔbaa fɔlɔ ye ni Samakɛ ka fili dɔ ye sanga 15nan tuma fɛ. Ntola wuliko fɔlɔ Nàna Se sanga 28 ni kɔmi 36 ma yɔrɔ min na, kɔngokaw ye Mali ka celu Yaara ka ntola ɲama Fifa n'o ye. O celu fɔlɔ in dònbaa Kɛra kàlamanin 5 tìgi ye, Eliya Meʃak kɔnin. Mali celutigi, Jigi Jara, n'ale fana tùn ye Mali ntolakulu kotigi ye, o ka fyɛnw Bìnna ka Ye dɔɔnin-dɔɔnin o yɔrɔ bɛɛ. U ye wuliko fɔlɔ Kɛ n'o fàrankan sanga 2 ye k'a Ban, 'ta ma Mɛnɛn 'sisi ma Bɔ Mali fàn fɛ.

Ntola wuliko flanan nàlen Kɛ, Eliya kelen in Wulila a deliko la tugun ka Kɔngo ka celu flanan Dòn ntola sanga 61nan tɛmɛnen 'kɔ ni kɔmi 23 ye. Mali Tora k'a ka celusɔrɔko caman Jɛn. Nka kɔngokaw nàli caman na Mali ka jɔda la, jɔ lankolon tùn tɛ ka To. Sanga 72nan Nàna Se kɔmi 45 ma yɔrɔ min na dɔrɔn, kɔnkokaw ka kàlamanin 21, ko Jonatan Bolinki, o Sinna ka celu yiibako 3nan Kɛ ten. Mali ntolakulu ta tɔ Kɛra yɛrɛɲini ni titati ye a ko la ten. Mali ye ɲankelisɛbɛn nɛrɛma sɔrɔko flanan Kɛ, Hamidu Sinayɔgɔ kàlamanin 9nan ka fili dɔ 'juru la.

Ntola banni Setɔ, u ye sanga 2 fàrankan Di a ko la. Ntola yɛrɛ Banna 18: 20 ye.

Jibril Drame ka degedenw ma se fɔlɔ Sɔrɔ nk'u y'u jeniyɔrɔ Fìn ɲinan CHAN na. Mali Kɛra dànkelen flanan ye fàrafinna mumɛ na. U ni Kɔngo min tùn bɛ ɲɔgɔn na nin ye, ale ka ntolakulu ka celutigi tɔgɔ tùn ye ko Matanpi. O y'i Jija a ka jɔ la kosɛbɛ walasa Kɔngo ka taako flanan Kɛ ni jansalan ye.

Ruwandakaw ka jamatigi tùn bɛ kɛnɛ kan. Fifa ɲɛmɔgɔ, Isa Ayatu, tùn bɛ kɛnɛ fana kan. O maaba fla ninnu ye ntoladenw ka fòliw n'u ka jàlaw dili Kɛ banbe kan.

Ncidɔri SÀBAATƐ bolonɔ dòn

 

Blàdon : 2016-02-07     Yɛlɛmako laban : 2017-01-07


I fɛla Fɔ fasiri kan :

Captcha

Jagomajira

Daɲɛgafe sànta

Fàkan bataki

Sìgidɔn

Jyɛn jamanaw

 

Mali duguw

Daɲɛsɛbɛn

Maralenw

2024

2023

2023-12

2023-11

2023-10

2023-09

2023-08

2023-07

2023-06

2023-05

2023-04

2023-03

2023-02

2023-01

2022

2021

2020

2019

2018

2017

2017-12

2017-10

2017-09

2017-08

2017-07

2017-06

2017-05

2017-04

2017-03

2017-02

2017-01

2016

2016-12

2016-11

2016-10

2016-08

2016-07

2016-06

2016-05

2016-04

2016-03

2016-02

2016-01

2015