FÀKAN

Kr Dukure >

Kr Dukure: dɔnniya forobayabaa

Mamadu Dukure ka baara kɛlen fànba bɛ dɔnniya forobayali kan. A ka kanko tàli sɛbɛ la o sababu ma Bɔ jamana ka yɛrɛya dɔrɔn laɲini kamà. Hali n'a y'a Sɔrɔ o sababu in dɔrɔn bɛ 'mɔgɔ Bɔ kanw baarali la, kùn wɛrɛ bɛ Dukure ta la ka Fàra o kan: dɔnniyaw forobayali. Kr Dukure ye bangudɔnna min ye a b'a fɛ bangudɔn faamuyaw ka Dòn mɔgɔw taabolo la. A kana Kɛ dalafɔ dɔrɔn ye walima kàlanjɛ dɔrɔn ye kàlandenw dɔrɔn kamà ka fàsojama fililen To. Dukure yɛrɛ ɲuman na, fàsojama kan kan ka Labɛn de. Faamuya hakɛlama dɔ bɛ yen bɛɛ ka kan k'o Sɔrɔ jamana ‘kɔnɔ. Mɔgɔ bɛ Se ka Yɛlɛn o ni 'san 'cɛ nka mɔgɔ man kan ka Ye o hakɛ ni dugumana 'cɛ. An dun ka jamanaw kɛcogo b'a Jira an na ko faamuyaw ni ɲɔgɔn cɛ ka jan fàsodenw ni ɲɔgɔn 'cɛ. Minnu bɛ dɔ kàla ma bi dɔnniya dalilu kɛnɛmanw na olu ye zanninkelen-kelen jama 'tu la.
Kr Dukure ka kὲlɛ Kɛra dɔnniya ɲɛfɔli siraw taamani ye a kɛyɔrɔ bɛɛ la. A fɔlɔ, a bɛ To ka kàlandenw Weele ka Taa sannakolo cogoya Jira u la wula fɛ ka Dòn ʃu ‘kɔnɔ. Tle ni dugukolo ani kalo ninnu yɛlɛmacogo ɲɔgɔn 'da fɛ, a b'o faamuya jɔnjɔn Di u ma.
O siratigɛw la, Mamadu Dukure ye fasiri caman Sɛbɛn bangudɔn kan minnu Bɔra 'dɔnniyasɛbɛn ‘kɔnɔ min tɔgɔ ye ko Jama.
A ye jὲkafɔ caman fana Kɛ ka Bɔ 1976 sànw na ka Nà Se a bɔli ma cɛmakalanso la. O jὲkafɔw y'a To mɔgɔw Bɔr'a kàla ma ko "oxigène" bɛ Se ka Fɔ bamanankan na, a bɛ min Weele "ninan" na. Kabini yen, mɔgɔw Bìnna ka kàla Turu a ka baaraw la. A ye gafe-bayɛlɛma ani hakililasɛbɛn minnu Kɛ o bɛɛ 'sèn b'a ka dɔnniya forobayali la. A ye sojɔ gafe dɔ Sɛbɛn o siratigɛ la a ka bololamisɛnya-baaraw 'sèn fɛ ka Tla k'a sojɔminɛnw Dla. A ka dɔnniya forobayali cɛsiriw 'sèn fɛ, a ye dɔnniya miiriya minnu ɲɛfɔli Kɛ bamanankan na, a y'o daɲɛw fana Kɛ ka bamanankan Sɔsɔ daɲɛ kura caman na min ye dɔ Fàra o kan in kisɛya kan. Komin a ka forobayali tùn tɛ Dàn dɔnniya bolo kelen ma, a bɛ daɲɛ kuraw ye dakun caman kan i n'a fɔ jatedɔn daɲɛw, bangudɔn taw, latigɛdɔn taw ani kɛnɛsuma taw o n'a ɲɔgɔnna caman. A ka baara ninnu fànba y'a yɛrɛ ye. A mana jὲɲɔgɔn min Sɔrɔ waati min, a n'o bɛ dɔ Kɛ ɲɔgɔn fɛ i n'a fɔ Abdulay Bari. A ka baara dɔw Kɛra kuluw ‘kɔnɔ fana i n'a fɔ Bɛnbakan Dungew ani MAKDAS (Mali Kanko ni Danbe Se). O bɛɛ ye k'a Fɔ ko a ma K'a kelen na tùma bɛɛ. A y'i kwaa Da "Kùnkandɔn" "théorie de la relativité" bayɛlɛmani kan 2006 waatiw la k'o baara Foori 2007. A ka tɔgɔ dalen fɔlɔ o miiriya la ko "Kùnkanko", a Labanna k'o Blà k'o tɔgɔ Kɛ "Kùnkandɔn" ye min kɔrɔ ye ko " a ko sìrilen bɛ ko dɔ la, a ko bɛ 'tàli Kɛ ko dɔ kan walima a ko bɛ ko dɔ 'kùn kan". A bɛ "dɔn" Fàra a ka dɔnniyaw tɔgɔbajuw kan k'a Jira ko miiriya bɛ dɔnniya dɔ Kofɔ. A ye 'minɛ Kɛ bamanankan daɲɛ-dlacogo kɔrɔ dɔ ma o ye an bɛ min misali Ye "jidɔn, sòdɔn, jiridɔn, mɔgɔdɔn de ɲɔgɔn tɛ".

Blàdon : 2016-06-27     Yɛlɛmako laban : 2017-01-08


I fɛla Fɔ fasiri kan :

Captcha

Jagomajira

Daɲɛgafe sànta

Fàkan bataki

Sìgidɔn

Jyɛn jamanaw

 

Mali duguw

Daɲɛsɛbɛn

Maralenw

2024

2023

2023-12

2023-11

2023-10

2023-09

2023-08

2023-07

2023-06

2023-05

2023-04

2023-03

2023-02

2023-01

2022

2021

2020

2019

2018

2017

2017-12

2017-10

2017-09

2017-08

2017-07

2017-06

2017-05

2017-04

2017-03

2017-02

2017-01

2016

2016-12

2016-11

2016-10

2016-08

2016-07

2016-06

2016-05

2016-04

2016-03

2016-02

2016-01

2015