Zan Zɛribo de kɛra Màsamakɔnɔ fɔlɔ ye Màli tariku la
Màli tùbabumoriba Zan Zɛribo kɛra màsamakɔnɔ (Cardinal) ye. A kɛra kèrecɛnkuntigi ye Màli la min ka alabato fànga bònyara fo Kèrecɛnya jàla dàn kankɔrɔsigiya dira a ma 2017 sàn na. Diɲɛ kèrecɛnkuntigiba, Kèrecɛnmasa Faransuwa, y'a ŋàniya ni màsamakɔnɔ jàla ye kèrecɛnya la. Màsamakɔnɔ Zan Zɛribo bangera Segu, 1943 sàn desanbukalo tìle 27. A kɛra Bamakɔ diinɛkuntigi ye 1998 sàn na. 1971 sàn, a kɛra diinɛfa ye Segu. 1975 sàn, a taara diinɛkalan na Liyɔn fàransijamana kàn. Kàbini a sèginna a fàso la 1982 sàn, a ma sìgi, a ma ɲìnɛ, a ma sἑgɛn a ka baara la. 'Tùma o 'tùma, dɔ bɛ fàra a ka jàla kàn. A tɔgɔ ye kɔ̀w ni baw tìgɛ kà taa kùnkan bɔ fo Nfatikan, kèrecɛnya faaba 'kɔnɔ, Itali jàmana kàn. Kèrecɛnmasa Faransuwa y’a jìra jàma na ko Zan Zɛribo bɛ na kɛ Màsamakɔnɔ ye 2017 sàn zuwɛnkalo tìle 28. O kuma in bìlara 'ba la o dùgujɛ arabadonya dɔ fɛ, zuwɛnkalo tìle 29. O don, Kèrecɛnmasa Farasuwa y’a sìgi màsamakɔnɔya gòlo kàn. A tɛ bɔ o gòlo in kàn fo kà sàya se a ma. Ale de kɛra Màsamakɔnɔ 25nan ye minnu bɔra fàrafinna gun kàn. Nkà a ta in ye Màli 'sìyɛn fɔlɔ ye màsamakɔnɔ sɔrɔli la.
Blàdon : 2026-11-08 Yɛlɛmako laban : 2026-11-08










